Azərbaycan Respublikası Qida Təhlükəsizliyi Agentliyinin (AQTA) əməkdaşları tərəfindən Bakı şəhəri, Nərimanov rayonu, T.Əliyev küçəsi, ev 112 ünvanında fəaliyyət göstərən, fiziki şəxs Elxan Cəlal oğlu Hüseynova məxsus alkoqollu içkilərin satışı mağazasında plandankənar yoxlama keçirilib.

Bu barədə AQTA-nın İnformasiya təminatı və innovativ həllər şöbəsindən məlumat verilib.

Bildirilib ki, yoxlama zamanı ticarət obyektində qida təhlükəsizliyi sahəsində texniki normativ-hüquqi aktların tələblərinin pozulduğu müəyyən edilib.

Belə ki, aşkar saxtalaşdırılma əlamətləri olan 5 ədəd 1 litrlik, 25 ədəd 0,7 litrlik “OНЕГИН” əmtəə nişanlı və 5 ədəd 0,5 litrlik, 9 ədəd 0,7 litrlik “МЪНСКЪ” əmtəə nişanlı alkoqollu içki aşkarlanıb.

Faktla bağlı inzibati protokol tərtib olunub, sözügedən alkoqollu içkilərin satışı qadağan edilib. Nümunələr götürülərək laborator müayinələrə cəlb edilib.

Bu ilin yanvar-iyul aylarında SOCAR-ın Qaz İxrac İdarəsi 7,7 milyon dollar dəyərində qeyri-neft məhsulu ixrac edib. Bu da əvvəlki ilin müvafiq dövrü ilə müqayisədə 29,4 milyon dollar və ya 79,2 faiz azdır.

Bu barədə İqtisadi İslahatların Təhlili və Kommunikasiya Mərkəzinin (İİTKM) “İxrac İcmalı”nın avqust sayında bildirilib.

Qeyd edək ki, 2025-ci ilin yanvar-iyul aylarında SOCAR-ın Qaz İxrac İdarəsi ixrac gəlirləri 37,1 milyon dollar olub.

“Volkswagen”in Almaniyanın Osnabrük şəhərindəki zavodundan gələcəkdə hərbi təyinatlı avadanlıqların istehsalında istifadə olunması nəzərdən keçirilir.

“Bild” qəzetinin yaydığı məlumata əsasən, İsrailin “Rafael Advanced Defense Systems” şirkəti ilə əməkdaşlıq çərçivəsində zavodda “Dəmir qübbə” hava hücumundan müdafiə sistemi üçün dəstək avadanlıqlarının - raketlərin daşınması üçün ağır yük avtomobilləri, buraxılış qurğuları və elektrik generatorları və s. istehsalı planlaşdırılır.

Əməkdaşlığın həyata keçirilməsi üçün zavodun istifadəsi ilə bağlı müxtəlif variantlar müzakirə olunur. Məlumata görə, “Volkswagen”in səhmdarlarından olan Qətərin mümkün etirazları nəzərə alınaraq, Aşağı Saksoniya əyalətinin zavodun müəyyən hissəsini öz nəzarətinə götürməsi və “Rafael” ilə birgə müəssisə yaratması variantı nəzərdən keçirilir. Bu halda “Volkswagen” İsrail şirkəti ilə birbaşa əməkdaşlıq etməyəcək.

Qəzetin məlumatına əsasən, Aşağı Saksoniya əyalətinin Baş naziri Olaf Lies əyalətin Osnabrük zavodunun gələcəyi üçün mümkün sənaye həllərində iştirak imkanlarını araşdırdığını bildirib. Onun sözlərinə görə, zavod yüksəkixtisaslı əməkdaşlara və güclü texniki potensiala malikdir.

Qeyd edək ki, Osnabrük zavodunda “T-Roc Cabrio” modelinin istehsalının gələn il başa çatması planlaşdırılır. “Volkswagen” rəhbərliyi və işçilərin nümayəndələri müəssisənin gələcək istifadəsi üçün alternativ imkanların araşdırılması barədə razılığa gəliblər. İndiyədək zavodda hərbi avtomobillərin yalnız ayrı-ayrı prototipləri istehsal olunub.

Bakıda Azərbaycanın Müdafiə Nazirliyi ilə Pakistanın Müdafiə Qüvvələri Qərargahı arasında “Azərbaycan-Pakistan 12-ci İşçi Qrupu Səviyyəli Görüşü” keçirilib.

Müdafiə Nazirliyindən verilən məlumata görə, nazirliyin Beynəlxalq Hərbi Əməkdaşlıq İdarəsində keçirilən görüşdə hər iki ölkənin müdafiə qurumları arasında əməkdaşlığın cari vəziyyəti və inkişaf perspektivləri, eləcə də qarşılıqlı maraq doğuran digər məsələlər ətrafında fikir mübadiləsi aparılıb.

Görüşün protokolu imzalandıqdan sonra qarşılıqlı hədiyyələr təqdim olunub.

Amerika ağ kəpənəyi respublika ərazisində məhdud dairədə yayılan, karantin tətbiq edilən zərərvericidir. Azərbaycanda Bakı, Abşeron-Xızı, Quba-Xaçmaz, Lənkəran-Astara və Şəki-Zaqatala iqtisadi rayonlarının bəzi ərazilərində rast gəlinir.

Bu barədə Azərbaycan Qida Təhlükəsizliyi Agentliyinin (AQTA) İnformasiya təminatı və innovativ həllər şöbəsindən bildirilib.

Qeyd edilib ki, iqlimə uyğun olaraq il ərzində bir neçə nəsil verə bilir. Zərərvericinin sürfələri yarpaq ayasının əsas toxuması ilə qidalanaraq bitkinin yaşıl kütləsinə ziyan vurur. Meyvə bitkilərinə vurduğu ziyan isə məhsul itkisi ilə nəticələnir. Üçüncü yaş mərhələsində olan sürfələr bir neçə yarpağı bir-birinə bağlayaraq tor yuvalar qurub, sürü halında yayılır və budaqdan-budağa keçir. Beşinci yaş mərhələsindən etibarən sərbəst həyat tərzinə qayıdırlar. Azərbaycan şəraitində əsasən tut ağacına ziyan vurur.

Amerika ağ kəpənəyinə qarşı aparılan fitosanitar tədbirlərin əsas məqsədi zərərvericinin sayını azaltmaqdır. Ən təhlükəsiz mübarizə üsulları park, yol kənarı və həyət sahələrində torlar olan budaqları kəsmək və yandırmaq, tırtılları mexaniki yolla məhv etməkdir. Zərərvericidən qorunmaq üçün payız və erkən yaz dövründə meyvə ağaclarının ölmüş qabıqlardan təmizlənməsi, gövdənin əhənglənməsi, bitki qalıqlarının toplanması və məhv edilməsi, meyvə bağlarında və həyətyanı sahələrdə isə ağacların çətirləri altında torpağın şumlanması işləri yerinə yetirilməlidir.

Amerika ağ kəpənəyinin yayılmasının qarşısının alınmasında hər kəsin iştirakı vacibdir. Zərərvericini mexaniki yolla məhv etmək mümkün olmadıqda, aidiyyəti qurumlara məlumat verilməsi xahiş olunur.

Hörmətli Mehriban xanım!

Sizi doğum gününüz münasibətilə Ürəkdən təbrik edir, sizə uzun ömür, möhkəm cansağlığı və ailə xoşbəxtliyi arzulayırıq.

Azərbaycanın Birinci vitse-prezidenti və Heydər Əliyev Fondunun prezidenti kimi fəaliyyətiniz hər birimiz üçün örnəkdir. Sizin mədəniyyət, təhsil, səhiyyə və humanitar sahələrdə həyata keçirdiyiniz qlobal layihələr ölkəmizin inkişafına və beynəlxalq nüfuzunun artmasına əvəzsiz töhfələr verir. Eyni zamanda, şəhid ailələrinə, qazilərə və köməyə ehtiyacı olan hər bir vətəndaşa göstərdiyiniz diqqət və qayğı Sizin xalqımıza olan sonsuz sevginizin bariz nümunəsidir.

Dövlətimizin rifahı, xalqımızın tərəqqisi və işğaldan azad olunmuş torpaqlarımızın yenidən qurulması naminə apardığınız fədakar fəaliyyətinizdə sizə yeni-yewi uğurlar və müvəffəqiyyətlər arzulayırıq!

Doğum gününüz mübarək olsun!

Zülfəli İsmayılov

Bakı Şəhər İcra Hakimiyyətinin nəzarət-təftiş şöbəsinin rəhbəri

Heydər Əliyev Mərkəzinin binası Ukraynanın dövlət bayrağının rənglərində işıqlandırılıb.

Bu barədə Ukraynanın Azərbaycandakı səfiri Yuri Qusev sosial şəbəkədəki səhifəsində məlumat verib.

“Bu gün axşam Bakı özəldir! Təşəkkürlər, Azərbaycan!”, - deyə paylaşımda bildirilib.

Qeyd edək ki, avqustun 24-də Ukraynanın əsas dövlət bayramı olan Müstəqillik Günü qeyd olunur. Bu bayram Ukrayna Ali Radasının 24 avqust 1991-ci ildə Ukraynanın müstəqilliyinin elan edilməsi haqqında Aktı qəbul etməsi şərəfinə təsis edilib. Sənəd həmin il dekabrın 1-də keçirilmiş ümumxalq referendumunda yekun olaraq təsdiqlənib. Bu sənəd SSRİ-nin dağılmasından sonra Ukraynanın suveren dövlətçiliyinin tam şəkildə bərpasını rəsmiləşdirib.

Kənd Təsərrüfatı Nazirliyinin “Üfüq” Karyera İnkişafı Proqramı dünyanın nüfuzlu insan kapitalının idarə edilməsi mükafat proqramlarından biri olan “Brandon Hall Group HCM Excellence Awards” çərçivəsində “İstedadların İdarə Edilməsi” nominasiyası üzrə Qızıl medala layiq görülüb.

Nazirliyin İctimaiyyətlə əlaqələr və informasiya təminatı şöbəsindən bildirilib ki, “Üfüq” Karyera İnkişafı Proqramı Kənd Təsərrüfatı Nazirliyinin “Yüksəliş” İctimai Birliyi ilə əməkdaşlığı çərçivəsində həyata keçirilir. Proqramın əsas məqsədi yüksək potensiala malik perspektivli əməkdaşların müəyyənləşdirilməsi, onların inkişafının dəstəklənməsi və Nazirliyin kadr ehtiyatının formalaşdırılmasıdır.

Proqram çərçivəsində həyata keçirilən seçim prosesində 2 771 əməkdaş iştirak üçün müraciət edib. Üç mərhələdən ibarət seçim prosesindən sonra 30 əməkdaş proqramın qalibi elan olunub.

Qaliblərin inkişafı üçün mentorluq, daxili təlimlər və beynəlxalq təcrübə mübadiləsi imkanları yaradılıb. Onlar müxtəlif sahələr üzrə təşkil olunan inkişaf proqramlarında iştirak etməklə yanaşı, Çin, Koreya və digər ölkələrdə keçirilən beynəlxalq təlim proqramlarına cəlb olunublar.

Proqramın nəticələri onun yalnız istedadların müəyyənləşdirilməsinə deyil, həm də real karyera inkişafına töhfə verdiyini göstərir. Belə ki, 30 qalibdən 11 nəfəri proqram müddətində yeni rəhbər və digər yuxarı vəzifələrə təyin edilib.

1993-cü ildən fəaliyyət göstərən “Brandon Hall Group” insan kapitalının idarə edilməsi sahəsində müstəqil analitika və konsaltinq təşkilatlarından biri kimi tanınır. Təşkilatın “HCM Excellence Awards” proqramı istedadların idarə edilməsi, liderlik inkişafı, öyrənmə və inkişaf, işə qəbul və əməkdaşların cəlb edilməsi kimi istiqamətlər üzrə qabaqcıl təşkilati təcrübələri qiymətləndirir.

Mükafat proqramı çərçivəsində təqdim olunan layihələr müstəqil sənaye ekspertlərindən ibarət münsiflər heyəti tərəfindən qiymətləndirilir. Qaliblər “Qızıl”, “Gümüş” və “Bürünc” olmaqla üç dərəcə üzrə müəyyən edilir.

“Üfüq” Karyera İnkişafı Proqramının “İstedadların İdarə Edilməsi” nominasiyası üzrə Qızıl medala layiq görülməsi Kənd Təsərrüfatı Nazirliyində insan kapitalının inkişafı, istedadların idarə edilməsi və əməkdaşların karyera imkanlarının genişləndirilməsi istiqamətində həyata keçirilən fəaliyyətlərin beynəlxalq səviyyədə tanınmasının göstəricisidir.

Belçikanın Mehelen şəhəri və ətrafında heyvanlar, o cümlədən atlar və ağcaqanadlar arasında Qərbi Nil virusu aşkarlanıb.

Şəhər rəhbərliyi şənbə günü xəbərdarlıq yayaraq həkimləri mümkün insan yoluxmalarını nəzərə almağa çağırıb. Belçika Qızıl Xaçı isə Vilvorde ətrafından qan verən donorları infeksiyaya görə test etməyə başlayacağını açıqlayıb. Gent Universitetinin professoru Hans Nauvinck bildirib ki, virus əsasən quşlar arasında dövr edir, lakin insanlara və atlara da keçə bilir. Mütəxəssis qan köçürülməsi zamanı yoluxma riskinin artdığını vurğulayıb və donorların yoxlanılmasını məqsədəuyğun sayıb. İnsanlarda infeksiyaların əksəriyyəti yüngül keçir və yalnız təxminən dörd yoluxandan biri baş-əzələ ağrısı və qızdırma kimi simptomlar yaşayır. Çox nadir hallarda xəstəlik meningitə səbəb ola və ölümlə nəticələnə bilər. Federal hökumət ağcaqanad sancmalarından qorunmağa çağırır. Alimlər yayılmanı iqlim dəyişiklikləri ilə əlaqələndirirlər.

Bu nəticə bizim üçün həqiqətən çox vacib idi. Bizə inanan, bizi dəstəkləyən azarkeşlərimizə minnətdaram.

Bu sözləri qadın voleybolçulardan ibarət Azərbaycan millisinin üzvü Marqarita Stepanenko Bakıda keçirilən Avropa çempionatında Rumıniya yığmasına 3:2 hesabı ilə qalib gəldikləri matçdan sonra deyib.

Təcrübəli voleybolçu qarşılaşmanın çox ağır və gərgin mübarizə şəraitində keçdiyini vurğulayıb: “Rəqib bizə qarşı həqiqətən çox yaxşı hazırlaşmışdı, biz də eyni şəkildə. Meydanda əlimizdən gələnin ən yaxşısını etməyə çalışdıq. Matç boyunca müəyyən eniş-yoxuşlar, gərgin anlar yaşansa da, öz işimizin öhdəsindən gəldik”.

O, növbəti mərhələyə vəsiqəni təmin etmələrinə baxmayaraq, qarşıdakı oyunlara da ciddi yanaşacaqlarını bildirib: “Artıq növbəti mərhələyə vəsəqəni təmin etmişik. Lakin bunun bir önəmi yoxdur. Qarşıda daha iki oyunumuz var və məqsədimiz pley-offa qrup lideri kimi çıxmaqdır”.

Qeyd edək ki, xallarını 8-ə çatdıran Azərbaycan millisi C qrupunda liderliyini davam etdirir. Yığma daha əvvəl Portuqaliya komandasını 3:1, İspaniya yığmasını isə 3:0 hesabı ilə üstələyib. Milli komanda növbəti oyunlarını Belçika və Niderland seçmələrinə qarşı keçirəcək.