İlk dörd ay üzrə Azərbaycanda iqtisadi meyillərin təhlilinə əsaslanaraq, Hesalama Palatası ilin sonunda neft sektoru üzrə ÜDM-nin nominal məbləğinin dürüstləşmiş göstəricidən daha çox olacağı qənaətinə gəlib.
Bunu Hesablama Palatasının sədri Vüqar Gülməmmədov Milli Məclisin İqtisadi siyasət, sənaye və sahibkarlıq komitəsinin iclasında "Azərbaycan Respublikasının 2024-cü il dövlət büdcəsi haqqında" qanunda dəyişiklikliyin müzakirəsi zamanı deyib.
V.Gülməmmədov vurğulayıb ki, təqdim edilmiş məlumatların təhlili 2024-cü ilin dövlət büdcəsinin yenilənən layihəsində 2024-cü il üzrə icmal büdcəsinin qeyri-neft baza kəsirinin qeyri-neft ÜDM-ə nisbətinin 24,5% proqnozlaşdırıldığını göstərir ki, bu da müvafiq göstəricidən, yəni büdcə qaydası çərçivəsindən az da olsa, kənarlaşma olduğunu deməyə əsas verir.
Onun sözlərinə görə, hədəfdən kənarlaşmaya bir neçə amil təsir edib.
“Bunlardan birincisi odur ki, yenidən baxılan layihə üzrə icmal büdcənin baza xərclərinin artımı icmal büdcənin qeyri-neft gəlirlərinin artımını üstələyib. Maraqlı məqam odur ki, büdcənin faiz xərclərinin büdcədən azaldılması da büdcə qaydasına mənfi təsir göstərib. İkincisi odur ki, qeyri-neft-qaz sektoru üzrə ÜDM-də artım istiqamətində dəqiqləşmə çox cüzi olub”, - deyə o əlavə edib.