Dünən Bakıda Yunanıstanın Milli Günü qeyd edilib.

Əvvəlcə hər iki ölkənin dövlət himnləri səsləndirilib.

Sonra Yunanıstanın Azərbaycandakı səfiri Xristos Kapodistrias açılış nitqi ilə çıxış edərək, Yunanıstan-Azərbaycan əlaqələri barədə danışıb. Diplomat bildirib ki, Azərbaycan müxtəlif sahələrdə Yunanıstanın uğurlu tərəfdaşıdır. Enerji sahəsində isə bu əməkdaşlıq strateji tərəfdaşlıq - müttəfiqlik səviyyəsinə yüksəlib. Trans-Adriatik Boru Kəməri (TAP) bu tərəfdaşlığın bariz nümunəsidir.

"Enerji sektorunda əməkdaşlığımız artıq uğur hekayəsidir. Cənub Qaz Dəhlizinin (SGC) həlledici hissəsi olan Trans-Adriatik Boru Kəməri (TAP) Avropanın enerji təchizatı problemində Azərbaycan qazını Avropaya nəql edən strateji infrastrukturdur və Yunanıstan üçün əhəmiyyətlidir. Bu layihə ölkəmizin təbii qaz idxalının təxminən 25 faizini təşkil edir ", - deyə səfir vurğulayıb.

Yunanıstan Xarici İşlər Nazirliyinin Baş katibi Dimitris Skalkos Yunanıstan-Azərbaycan əlaqələrinin həm dövlətlər, həm də xalqlar arasında uğurla inkişafı etdiyini və gələcəkdə daha da genişlənəcəyinə ümidvarlığını ifadə edib.

Azərbaycan hökuməti adından çıxış edən xarici işlər nazirinin müavini Elnur Məmmədov deyib ki, 33 illik əlaqələrə malik Azərbaycan-Yunanıstan əməkdaşlığı müxtəlif sahələrdə, o cümlədən iqtisadiyyat, enerji, nəqliyyat, elm və təhsil, mədəniyyət, turizm və digər sahələrdə inkişaf edib.

Diplomat bildirib ki, bu illər ərzində ölkələrimiz arasında müntəzəm olaraq yüksəksəviyyəli məhsuldar görüşlər keçirilib. Prezident İlham Əliyev ilə Yunanıstan Respublikasının Baş naziri Kiriakos Mitsotakis arasında keçən il COP29 çərçivəsində keçirilən görüş ikitərəfli münasibətlərimizin möhkəmləndirilməsində növbəti mühüm addım oldu.

"Biz ölkələrimiz arasında yüksəksəviyyəli siyasi dialoqu yüksək qiymətləndiririk. Qətiyyətlə inanıram ki, Azərbaycan Respublikası ilə Yunanıstan Respublikası arasında qarşılıqlı hörmətə əsaslanan ikitərəfli münasibətlər və əməkdaşlıq dövlətlərimizin, xalqlarımızın rifahı naminə bundan sonra da inkişaf edəcək", - deyə E.Məmmədov əlavə edib.

Sonda Yunanıstan milli musiqisinin səsləndirildiyi bədii hissə qonaqlara nümayiş etdirilib və furşet təşkil olunub.