Yeni araşdırmaya əsasən, müntəzəm olaraq yumurta istehlak etmək insanda ürək-damar xəstəliklərindən ölüm riskini azalda bilər.
Avstraliyanın Monaş Universitetinin tədqiqatçıları 70 yaş və yuxarı 8700-dən çox insanı izləyiblər. Araşdırmanın nəticələrinə görə, həftədə bir və ya altı yumurta istehlak edənlərin ayda iki dəfə yaxud da daha az yumurta yeyənlərlə müqayisədə ölüm riski 15 faiz aşağı olub.
Alimlərin fikrincə, yumurta əsas qida maddələrinin — protein, B vitaminləri, fol, doymamış yağ turşuları, yağda həll olunan vitaminlər (E, D, A və K), xolin və müxtəlif mineralların mənbəyidir. Bununla yanaşı, yumurtanın tərkibindəki xolesterol uzun müddətdir ki, yüksək xolesterolu olan insanlar üçün sağlamlıq baxımından riskli hesab edilirdi. Yüksək xolesterol damar tıxanmasına səbəb ola bilər və bu da ürək xəstəlikləri və ya insult ehtimalını artırır. Bu səbəbdən tədqiqat qrupu dislipidemiya (klinik olaraq müəyyən edilmiş yüksək xolesterol) diaqnozu qoyulmuş şəxslər üzərində əlavə araşdırmalar aparıb. Vurğulanıb ki, dislipidemiyası olan və həftədə bir yumurta yeyən iştirakçıların ürək-damar xəstəliklərinə bağlı ölüm riski, nadir hallarda və ya heç yumurta yeməyən insanlarla müqayisədə 27 faiz daha aşağı olub. Bu nəticə göstərir ki, dislipidemiya yumurta istehlakı ilə əlaqəli riski əhəmiyyətli dərəcədə dəyişdirmir.